Aldersvennlege tiltak frå Gøteborg
![](https://www.aldersvennlig.no/aktuelt/aldersvennlege-tiltak-fra-goteborg/_/image/06ccdb6d-cb6b-47e0-b4a4-586e5656afd6:1e86a79e2b1b419d26ff54bdd0b5b05183a774c9/width-1200/Goteborg_1_1.png)
Emma Matsson, utviklingsleiar i Åldersvänliga Göteborg, var andre forelesar ut i webinarrekka der vi løftar fram perspektiv frå det internasjonale aldersvennlege arbeidet. Emma delte raust frå Gøteborg sitt arbeid og viste til fleire konkrete tiltak: alt frå benker og bustad, til transport og digital inkludering.
– Vi har henta mykje inspirasjon frå Noreg, og no håpar eg de kan få litt inspirasjon frå arbeidet vårt òg, innleidde Emma. Ho viste til Rosa bussar i Oslo, og etter kvart også Rullatorløpet i Oslo og Generasjonsleikane som Gøteborg skal arrangere for første gong i august i år.
Gøteborg er medlem i WHO sitt globale nettverk for aldersvennlege byar og lokalsamfunn og Nordens velferdssenters nordiske nettverk for aldersvennlege byar og lokalsamfunn. Sidan 2016 har dei jobba for å bli meir aldersvennleg og inkluderande.
Her kan du sjå opptak av webinaret.
Aldersvennleg handlingsplan
Emma fortalde korleis dei har involvert fleire avdelingar i kommunen, og fått forankra arbeidet med aldersvennleg på tvers. Det har resultert i ein eigen handlingsplan med tiltak som skal gjere byen til ein god stad å bli eldre. Handlingsplanen er òg tett knytt opp mot FN sine berekraftsmål. Heile vegen har det handla om å snu utfordringane med ei aldrande befolkning til ei moglegheit.
– Med eit aldersvennleg perspektiv i planlegginga, skaper vi moglegheiter for den yngre generasjonen, men også kommande generasjonar, understreka Emma.
![emma mattson smiler til kamaera](https://www.aldersvennlig.no/aktuelt/aldersvennlege-tiltak-fra-goteborg/_/image/dfc62170-ef03-48c8-a099-b83eb874a085:049fd3ad15adce49e640820670dc96093e92d836/width-768/emma%20mattson_aldersvennlige%20goteborg.jpg)
Involvering og samarbeid på tvers om Aldersvennlige Gøteborg gjer at arbeidet fungerer som ei samhandlingsplattform – både internt, men også eksternt.
– Når vi møtest på tvers av administrasjon, næringsliv, innbyggjarar og organisasjonsliv, så hender det noko. Det blir meir enn å gjennomføra aktivitetar i ein handlingsplan. Det handlar om å læra å kjenna kvarandre og skapa synergieffektar.
Fleire konkrete aldersvennlege tiltak
Tiltaka i Gøteborg si handlingsplan er fordelte på seks innsatsområde, og spring ut frå WHO sitt rammeverk for aldersvennleg utvikling: mobilitet, sosial deltaking, bustad, stadsutvikling, informasjon og kommunikasjon, og samfunnstenester og service.
Emma viste til fleire døme, mellom anna "pratbänkar", auka tilgjengelegheit i kollektivtransporten, investeringar for auka digital kompetanse og servicebustader som også skal fremje møte mellom ulike generasjonar.
Seniorressursen som framtidsutviklarar
For å sikra medverknad gjennom heile arbeidsprosessen med Aldersvennlig Gøteborg vart det laga eit eige oppdrag for seniorar som fekk namnet Framtidsutviklarar. Dette er ei gruppe seniorar, som ønskjer å bidra på frivillig basis i arbeidet for eit meir aldersvennleg Gøteborg. Dei må likevel gjennom ein eigen prosess, med søknad, cv og intervju.
– Deltakinga til seniorane er grunnlaget for å lykkast med å skape aldersvennlege samfunn.
– Framtidsutviklarane har ulik erfaring og kompetanse, kjem frå ulike delar av Gøteborg, men dei har eit stort engasjement i arbeidet med å skape ein aldersvennleg by, fortalde Emma.
Framtidsutviklarane er involvert i alt frå byplanlegging til digital inkludering.
– No er dei så ettertrakta at vi søkjer fleire, kunne Emma fortelje.