Helsepolitisk barometer: Vi planlegg for livet som pensjonist

Åtte av ti nordmenn meiner at den enkelte må ta større ansvar for eiga helse, sosialt liv og eigen bustadsituasjon for å sikre seg ein god alderdom. Og vi er flinke til å planleggje. Både for eigen økonomi og bustad.

Det viser tala i Helsepolitisk barometer som Kantar har gjennomført for mellom andre Senteret for eit aldersvennleg Noreg.

− Dei siste fem åra har det vore ei stabil brei semje om at kvar enkelt må ta større ansvar for eiga helse, sosialt liv og eigen bustadsituasjon for å sikra seg ein god alderdom. Og ansvar det tek vi, seier Wenche Halsen, leiar i Senteret for eit aldersvennleg Noreg.

− Barometeret viser at fleire har gjort seg tankar, eller lagt ein plan for å få det tilværet dei ønskjer som pensjonistar. Det er gledeleg. Når me veit at me lever nær ein tredel av livet vårt etter at me har vorte pensjonistar, er det fint å sjå at mange legg planar for å sikre seg ein god alderdom.

Oppslutninga søkk blant dei eldste

Både semja om, og støtta til å ta ansvar for tilværet aukar med alderen. Nærare ni av ti over 60 år er heilt eller delvis samd i at den enkelte må ta større ansvar. Men oppslutninga søkk blant dei eldste samanlikna med tidlegare år.

I 2023 meinte 93 prosent av dei over 75 år at folk må ta større ansvar for eigen alderdom, medan talet sokk til 86 prosent i 2024 og vidare ned til 85 prosent i år.

Økonomiplanlegging på topp

Planlegging er ein viktig del av det å ta ansvar. Åtte av ti svarar at dei har lagt ein plan eller gjort seg tankar om korleis dei skal få det slik dei ønskjer som pensjonistar.

Økonomien er det folk først og fremst legg planar for. Her svarer halvparten av befolkninga – uansett alder, at dei har lagt planar.

Vidare har vi også lagt planar for korleis vi skal halde oss fysisk aktive når vi blir eldre. Det å kunne vere fysisk aktiv er blant det vi meiner vil vere viktig for eit godt liv som pensjonist. 

Det er aldri for seint

Sjølv om vi er gode på planlegging, peikar Wenche på at det framleis er mange som skyv det å bli eldre framfor seg. 11 prosent av dei over 60 år svarer at dei ikkje har lagt planar eller tenkt på korleis dei vil ha det som pensjonistar.

– Vi planlegg for det meste her i livet, og då er det også naturleg at vi skal leggje planar for dei siste 20 - 30 åra. Skal du gjere grep og endringar er det viktig å få det gjort før det er for seint, seier Wenche, og understrekar betydninga av at vi må få hjelp den dagen vi treng det.

Ei av oppgåvene til Senteret for eit aldersvennleg Noreg er å gjere innbyggjarane bevisst på kor viktig det er å planleggje for åra som pensjonist. Bli inspirert på planleggelitt.no.